الهوي والنور

جميل الصـدفة اللي جابتك حيي الهوى والنور
عليك اجمل مسا مسيت عطني منه قنطاره


أحي فيك ذكرك قبل شوفك والنبا مغمـــــــور
وأحيي فيك عطرك واسمك اللي مالي داره


أنا من مات حياً لاطعن حربه ولا منحـــــــور
صويب العين مايبرا غدا قلبي لك الشاره


بغيت امشي واحس انه غدا مني القدم مبتور
بغيت آقف واشوف أعظام كل الجسم منهارة


أنا من خانته عبرة فرح والا ضحك مسرور
يضيق إبه النفس وده يقول من الحكي خياره


أشيل غناي لك عرضه وأبدل به على المجرور
وأمول من طواريقي على عشاق سماره


أبكتب من قصيد الوزن وغيره من شعرمنثور
أنا لك شاعراً يكتب وشعره نقوة أفكاره


ألا ياغايب عني معي حاضر كما الدستور
خيالك ما يفارقني بفكري دق مسماره


أنا من ضقت أسولف بك على نفسي وانا مقهور
وأقول الوقت مايعطي على ماريد وأختاره


عليك أقبل ومنك أقفي ولا بينت لك محضور
أخاف عيون بعض الخلق ترقبنا وسباره


وجدك الله ياحسن كما التحفة وأنا جمهـــور
أنا المبهور في حسنك وانا من خطفت أبصاره


ومنك العين تامرني وأنا لك طايع مـــــأمور
على وصلك غدا حظي هوين وقصرت أشباره


أشوف إن الحسن عقبك ولويذكر غدا مكبور
يقال إنه حسن وألا أنت كل الزين وإبهاره


ألا يابوعيون حق وبعض الوصف خرساً حور
عليك الصوت ماهوصوت كما ترنيم قيثاره


بقا قصرك على فالك عساه بطلتك معمور
تمشي بردهته حافي وتحيا عقبك أزهـــــاره


بريح المسك والعنبر يخالطهم زراق أبخور
إلى أقبلت جا قبلك والى أقفيته غدا إستاره


على هالبوح والتلميح راس المال صدق شعور
وصدقني تري فكري عقب طيفك ماحد زاره


أنا باسألك تعذرني عساي بطلبتي معذور
أشوف الوقت مايعطي ولا فالناس عذاره


ذكرت اليوم والساعه ورحله عمر يامستور
ذكرت الله في خلقك خلق هالزين وأسراره


أعرف أني مني أول ولا آخر واحد ماسور
وأجمل ماملكته منه طيف دام تذكاره


ألا ياليت لي قلب يطيع الراي وأهل الشور
ضحيه موقف عابر ورحله سفر طياره


مقاعدنا بآخرصف ومقعد سيدي مشغور
على يسراي كان هناك اشوف أطباع جباره


أشوفه كل هالفتنه ثقل عقل وسلوك إطهور
حصين محصن شامخ يبين كبرمقداره


وأشوفه ديمه تحي نبات الأرض بالممطور
بغيث يوم أشاهدها جرفني فيه تياره


ذهلني مبرم العاتق وشلال الشعر موفور
وذاك المبسم الوردي بلون الزهرقطاره


وقد أطرق هايف رشيق وخاصر مضمور
قواماً إعتدل طوله يثير إقلوب جباره


أغني وأغتني بذكره ولا أطمع كود بالميسور
وعودي كم شكي مني بعزفي تبكي أوتاره


أحبك والهوى جاير وبحت السر لك بسطور
وقلبي ماسلى عنك ولو يتعبه مشواره


أبرسلك مع النسمه سلام الخافق المكسور
عسى يجبر عزاه أنك تجيه وتنطفي ناره


أعرف النفس تواقه وأعرف اني منا مسحور
ولكن سحر زينه صار ياخلق الله إشعاره


أنا والليل والهاجس قطعنا بالخيال بحور
أبي منهو يوصلني ومن يعطيني أخبـــــــــــــاره